Satur Simurjah

FIRDAUS DEPARI, SEBERAYA

Perkataan satur rehna ibas cakap India eme kap Chaturanga empat tentara India (Prajurit, Kuda, Gereta perang ras Gajah). Kalak Karo melala rupa permainen saturna, lit ia ilakoken dua kalak lit ka ia piga- piga kalak. Salah sada emkap permainen satur si lit piga- piga tembe-tembe: satur si bue anak, satur si telu bidak ras sitelu tir dua menteri ras sada lapis bidak. Lit ka ia igelari satur “simurjah”. Satur Simurjah e me, aturen permainen ibas satur Karo ija siarah bidak buena 11  ras 3 tirna,  menteri 1 tapi la banci murjah ras gajah 2, kuda 2 ras  raja  banci  murjah ngelawan si arah si deban ija  menterina 2 ras menteri 2 enda banci murjah  tapi rajana la banci murjah ras 2 gajah 2 kuda 2 tir bidak buena 8. Enda me buah satur kita kalak Karo, bagi banci sinen i kedai kopi Karo Sekali Seberaya.

Janah ndedah permainen catur si sangana erdalan, icubaken kami ngerana-ngerana ras sekalak orangtua, si akap kami kin pe banci nampati kita meteh uga kin satur Simurjah e.

RLG: “Mejuah juah nini bulang, ngerana kal ateku kita kentisik… Kerna kesemalen si ilakoken kita kalak Karo ibas  ersatur. Uga kin atur Si Murjah nini bulang?”

NBL: “Uai.. eak kerna seser tah pe satur si imaksutndu kempu  nini bulangna, tah kin ersatur ka atendu kita lebe?”

RL: “Kerna percibal ras perdalin satur simurjah enda enggo aku ercakap- cakap ras piga- piga teman i kede kempundu ah kedei Karo Sekali saja kerna uga kin sini ertiken SIMURJAH enda nini bulang?”

NBL: “Bage nda kempu nini bulangna sope kuturike, kam pe arus ngertiken janah ngatusi kerna perdalan satur kempu. Sabap kuturiken kam pe teh ndu uga perkiam gajah, uga perlompat kuda, uga perdalan bidak, uga ka raja banci merjat alu perdalan kuda, uga ka raja simurjah ningkah dingen ia merjat imbang, janah uga ka kuda terdenden uga ka ia raja ibas paksa terdenden, janah uga ka raja paksa ia mbettu, janah uga ka sah kuda adi la erkawal banci iperjat raja si ngesahi raja, dingen uga ka kuan- kuan: lanai ka terkaroi saturna, janah uga ka ikataken emat embun, janah erbuang menteri sah kuda la tertudung. Enda ia kempu nini bulangna,……..janah uga maka satur simurjah banci raja ngemat janah la tertudung ….banci ka emat tepung ia kempu nini bulangna, enda kerna perdalanen satur kempu, enda si ni bahan nini-ninita jaman si adi.”

RL: “Kai kin si iertiken  murjah e nini bulang? Si pernah  ku begi eme kap jelma nge ikataken murjah?”

NBL: “Kerna perkataan murjah, lompat ia labo meganjangsa banci ku lebe banci ku pudi banci ku lebe banci ku kawes banci ku kemuhen ..o kempu.”

RLG: “Tapi lit ka ikataken landek murjah ni bulang, e uga ia?”

NBL: “Kerna si ena  kempu e biasana landek e me kap ia arus ngikuti sora gendang ras buku gendang. Ia ngendek alu murjah ibas buku gendang kempu, la terjeng ngendekken saja o ..kempu banci ka ia ngurjahken itengah buku gendang.”

RLG: “Kerna landek murjah ndigan-ndigan ka sicakapken nini bulang. Si perlu man bangku kerna satur simurjah enda ndai bulang.”

NBL: “Bagenda kempu nini bulangna, ibahan nini-nininta sada permainen si la ia sitokohen tah la si ombangen  ban raja murjah ngelawan menteri dua, murjah ia satur seri ia kempu. Si apai pe banci sitalun seri ia la ia situalen  saja ngenca la seri kuakap ras satur si papanna mbiring ras mentar ah kempu.”

RLG: “Si iertiken ….la ia si tokohen la ia si ombangen kai e nini bulang ku….la kal kap kuantusi.”

NBL: “Je kap enggo teridah maka kita kalak Karo enda lalap ertimbang tengah rukur, kempu. Arah ja pe ia pang tapi ula ia sigombangen. Jenari kempu, adi sitik si beluhen banci ka petambahken nangdangi temanta si ersatur.”

RLG: “Eah bulang, melala nari nge kal pe pengertin ibas satur enda, lit erbuang, lit emat embun, lit ka ia emat tepung, lit ka raja nggo mbettu, lit ka ia lanai terkaroi, lit ka petambahken lit ka ia satur si bue anak.. Sada -sada sitorosi bulang..kai kin ertina erbuang e bulang ras emat embun ni bulang?”

NBL: “Bagenda kempu. Pengertin erbuang enda e me sada dalin bas satur lako nehken sura-sura, banci ibuangken menteri tapi isah alu kuda  la tertudung emat ia kempu, labo erbuang tengah pasar e;; ma la payo…?!”

RLG: “Kai ka bedana ras pedah tua- tua ula kal kam  erbuang lepas impal….nina ni bulang?”

NBL: “Bagenda ka kempu. Sitik banci kujelasken sabap la je ingan kita ercakap kerna penungkunen ndu eee.. kempu. Ula erbuang lepas nina, si iertiken emkap kenca lanai lit sekalak manusia si njumpai perpadanenna ras Dibata gelah keluarga sierceda ate lalap nghamati kalimbubuna bage ka ia kempu.”

RLG: “Bujur bulang siterusken bulang kerna emat embun, emat tepung kai ka kie nini bulangku?”

NBL: “Adi ikataken ia emat embun kempu, banci telu kali erdalin enggo kena sah emat raja, si kena sah ban lanai tertudung ras lanai banci ia murjah ku kawes kemuhen tah ku ku pudi ras ku lebe tah kin ia lompat bagi perlompat kuda kempu. Janah ikataken ia emat tepung permatai raja ia pas itengah tengah papan satur  itengah ia  kena sah jenari emat tah raja lanai banci kiam ku ja pe kempu urjahkenna pe bana lanai lit taneh kerah kempu.”

RLG: “Ndai ikataken ndu lit ka lanai terkaroi kai kin antusen tah pengertin lanai terkaroi e nibulang…….?”

NBL: “Endam ka tanda kanam-kanam cakap persatur kempu nini bulangna, nina: “Enggo dung mpal rajandu ena lanai kap terkaroi!”. Ertina melala kal kempu. Banci jadi dilo pe kerina kalak Karo, saturna enggo pasti emat, tah kin dilo nini bulang merga Karo-karo kerina tah kin pe ikut pe si beru Karo kerinana, lanai tertambari. Ertina, dilo pe kerina kalak Karo i belang pertibi enda encakapkenca, pasti enggo emmat ..ei kempu.”

RLG: “Adi ikataken raja enggo mbettu, kai kin ertina bulang?”

NBL: “Ue….adi pepagi ikataken mbettu eme kap raja ibas paksana lanai lit ingan na erdalin teh inganna lompat, tah lanai banci muit  igelari me raja ibas sada paksa mbettu.”

RLG: “E.. seri kap sanga na raja na ibas situasi si mbau..me bulang?”

NBL: “Ena kempu nini bulangna tanda kita kalak Karo enggo pantas ncibalken ranan la seri mbettu ras mbau kempu nibulang na…adi ikataken mbau la cocok ibegi cuping, la sikap bas pusuh, kempu nini bulang na.

RL: “Payo dingen tengteng bulang ..anum aku pe ikataken enggo mbau raju ndu ena, teh enggo ko mabau ningen banci kang bidak samping ngerana..me bulang?”

NBL: “La ka gia kujena kal kempu ena gelarna ngeteh adat tapi la ndalanken adat … cakap ndu ena la cakap si maba kinimajun.”

RLG: “Oee …. eak nini bulang. Nungkun aku terbagesen kerna catur simurjah enda bulang, kerna iketenna ras peradaten kalak karo nibulang uga ia  turi- turinna?”

NBL: “Ia bagenda kempu. Kerina si lit sini bahan nini-ninta si kin ulih perukuren kalak Karo, gunana e kerina muat keriahen ukur kempu. Kai maka bage ningku, kami nini bulangndu nai labo ersatur saja dahin kami. Lit paksa paksana. Saja ngayak satur la ncedai peradaten, e mehuli ibas kegeluhen kalak Karo. Labo lit si ngatakensa maka sada permainen satur  labo ngelanggar adat kempu, tapi ija ibas paksa ijadiken satur jadi sada dalin ku judi,  ije me satur enda nggo salah ilebe lebe peradaten kita kalak Karo. Sabap kai maka bage ningku kempu, lit kang jelma tah manusia njadiken satur e jadi ingan perjudin tapi perbahan ia ndekah ibas aturenna la melala kalak si ngikutkesa kempu.”

RLG: “Tik nari kel bulang…..ibas pengertindu kerna satur simurjah enda, kuakap sada permainen rayat Karo si rulo. Kai kin ia si tuhuna kal  antusenna nangdangi  perdalanen kegeluhenta si si teptep wari si erpala ken Merga Silima,  Tutur Siwaluh,  Rakut Sitelu bage pe ras Perkade-kaden Sisepuluhdua, terlebih lebih i  jaman enda enggo jaman si maju bulang nibulang?”

NBL: “Situhuna kal kempu, kerna penungkunen ndu ena kita arus tetep pagi perdalan kai-kai si lit ibas gelar buah satur kempu. Kita tetep ngkawal dirinta dahkam melala kal godan  tah barang- barang si mbaru kuidah gundari. Kita tetep nggeluh  sikawalen, ibas kita jadi anak beru arus kita banci ngkawal teman sangkep nggeluh ibas pertibi enda si andingken. Saja kita arah raja simurjah ibas kotak si waluh kempu, kita si tuhuna arus ersada tetap si kawalen sabap setan tah iblis nge jadi imbangta si kin menterina banci murjah duana lako guna nerang kita kempu nini bulangna. Maun-maun kita arus erkurban guna nehken sura suranta guna ngelawan imbangta. Kalimbubunta tetap sikawali bage pe senina sembuyakta tah kin anak berunta si kin ia pang arah lebe si jadi kawalta. La obah na kempu kita ipepajek raja-menteri-gajah kawes kemuhen –kuda kawes kemuhen- tir kawes kemuhen, bidak sada baris, si enda tetep lalap sada iketten guna nehken sura sura ibas ngadapi imbang si la mehuli. Terlebih lebih kita arus si keleng-kelengen guna ndatken kemalemen ate. Kuncina kal kerna satur enda kempu kita nggeluh lalap sitatang- tatangen ibas kata wari paksa pe. Adi kita jadi anak beru, kita tetap numpak numpak kalimbubunta, adi kita anak beru kita aru jadi sikawal kuda dalin nangdangi kalimbubunta. Bage ka pe kita jadi senina tetap sikawalen man seninanta. Tetap kita nggeluhken kegeluhen guna nerusken perdalanen peradaten sue ras gelar buah satur si lit ibahan nini nininta.”

RLG: “Jadi ertina bulang kita tetap: metenget, megermet, mesimet, metinggel, mediate ibas kita ndalani perdalanen kegeluhenta segedang -gedang nu wari ma bage kin ia bulang?”

NBL: “Egia kai kin gelar majalah ndu e  kempu, piga piga kali kita nggo ngerana kempu nini bulangna, sabap ma sieteh ka nge ateta kin kin gelar aron nduee…?”

RLG: “Gelarna  Ralinggungi, bulang ertina nerangi ..lako nehken kata tuhu alu tengteng ni bulang..”

NBL: “Kuakap kap gung si e bolo -bolo sorana.”

RLG: Bage me sura-sura ras perjuangenta, bulang!”

                                

NBL: “Bujur kempu kerna teh si kuinem enggo igalari   nderbih…”

RLG: “Mejuah-juah bulang.”