Anding - andingen

Bagi ancit, adi ersada rubat, adi sirang sidaramen, emaka inganna jumpa bas gebuk api
Andingenna, jelma jabu si rusur pejentik, rusur rubati adi ersada, tapi adi sirang sitedehen. Emaka bas kerja kesuhsahen rusur dalanna pulung, umpama kerja kepaten.
Bas lau nari gara api
Si aturen pedameken reh pegebuken, maba pecah perang. Umpama bas ranan. Idilo anak beru pejoresa. Kerehenna la pekenaken tapi pegebukken, seh ranan e rontang.
Lain-lain babah nina babi
Antusenna, kerna nanam entabeh la seri man tiap jelma. Kai akap sesekalak entabeh, jelma si deban la ka mesegu.
Adi pirah babi, enggo kenca man nadahken pelangkah
Ikataken man kalak si kenca elah man minter medem. Rimahna la isapuina lebe, janah perpangan ipediatna ampar.
Bagi si njarumi baju, icaingi muat jilena. Dagangen ijampuli lebe maka ijadiken paken.
Enda biasa iandingken ibas runggun. Radu-radu encidahken ukur, mawen-mawen sisimbaken, gelah dat kesimpulen si mehuli.
Man anakna bagi bado
Ikuanken mak kalak singkuruk juak-juak entahpe pengikutna guna pejore bana.
Si des/seri : - Bagi biang kuring, man anakna
Bagi baling-baling, ija nari angin rembus, kuje alakenna
Iandingken kukalak si la tetap rukur. Apai si mbelinna kuasana ikapitina. Rimbang ras temanna ka akapna dalih adi nguntungkenlah man bana.
Si des/seri : - Bagi sanggar uruk-uruk, kuja angin rembus kuje ia mbole.
Biring-biring banban. Batang ban-ban mbiring, tapi melinang.
Ikataken kempak kalak si perbiring-biring rupana, ngena ate.
Si des/seri : - Biring-biring manggis, mbiring gia, adi entebu.
Erdire-dire iluhna bagi buah banban siteruk-teruken
Ikataken kukalak si perah perngandungna, la erpeltep iluhna cires mambur.
Iluhna bagi tangge banban nguda, dem-dem bas mata, tumbuk-tumbuk bas isang, pecah-pecah bas perampun
Ikataken kempak kalak si ndekah janah mehantu pertangisna.
Bagi si ngelulus bangkar, si arah teruh idedeh, si arah datas niangkat
Ngandingken perukuren la bujur, la rembang tengah. Jelma si jore, ipejore, si mberat, iberati. Umpamana kalak si angkat telor man jelam si ganjangen asang ia. Tapi jelma si teruhen itokohina. Ngandingken timbangen perkara si bage tempasna, ningen : Ukum si taka buluh, si arah datas iangkat, si arah teruh idedeh.
Bagi baning, setahun nangkeng-nangkeng sada wari ngincuah
Baning serbage (sejenis) lebo, inganna bas kerangen. Erdalan la pedas. Sada-sada penangkengen ndekah ia ndalanisa. Tapi adi perlu akapna guna ngkawali dagingna, igulungna bana. Erdelang me ia kusuah.
Andingenna, lagu mehuli mahan ate kalak jadi, ndekah erbanca. Tapi adi la metenget, lagu si mehuli si ertahun nuanca e, lasam kerina, perbahan sekali erbahan ceda.
Bante biang, mereng
Ido si mesera ngalokenca, perbahan akap peridon utangna e enggo utang si sia-sia.
Bante juljul, dapet ergana
Bante juljul emkap jukut si juljul-juljulken naring man kalak si deban, sabab bengkau e lanai keri. Asakai ate si nukur ergana ase, ndigan pe igalarina labo dalih. Enda biasa bas pantemen terpkasa, umpama kerbo megulang.
Biasa iandingken kujelma si la nai siat bas jabu (singuda-nguda si enggo mehuli dagingna). Ingan tersereh la nai milih, gelah anak enggo erbapa, gelah anak enggo ermerga. Emas unjuken la nai man perserewaten (perjengilen). Biasa ijuljulken kalimbubu ku anak beruna.
Adi la bage labo keri barang i tiga
Barang si kutera pe itiga lit nge si nukursa. Tiap barang, mehuli entah lahang, lit kalak si merlukenca.
Biasa iantusken kempak si medanak, ngatakenca kerina jelma lako. Bicara mejin pe sekali rupa, entah lagu kurang, lit ka nge kalak si rete ngena.
Tumburen Bareh
Sitik saja bareh, tertumbur minter mesui.
Ikataken man kalak si mesunah ukurna sigel. Sitik ibahan ceda man bana, minter ia mengil-ngil, meruntus.
Dengut-dengut bagi bareh pepulung nanah
Iandingken kempak peraten si mesui, ukur rembek-embek ibas sada-sada tangkelen.
Bagi si ngonggar batang buruk, adi nionggar getem si getemna, adi la nionggar macik si macikna
Kerna sada-sada tangekelen si serbut. Isingetken pe man teman erbanca ate morah ngenca, labo kena sampaten. Adi ierem-erem saja pe ibas ukur, ngalah ngukurisa.
Bagi si njujung batu, lalap mberat
Iandingken kempak baban nggeluh si mesera, lalap la lit si menahangna.
Bagi batu, kitik entah galang gia lau, lalap nge ia iteruh
Kerna kinigeluhen si mberat. Kumalih pe jaman, baban nggeluh la reh nahangna.
Bagi si ngayak batu megulang, ayak reh dauhna
Kerna sura-sura si la terayak-ayak. Umpama sekalak perbinaga. Akin ipebelin pasangenna, akin reh beratna man bana..